Autismo ta un opstákulo den desaroyo di funshonamentu di selebre di un persona. E ta manifestá mas tantu den e desaroyo soshal i komunikativo. E opstákulo aki ta stroba e hende di asimilá e señalnan ku ta drenta via su sentidonan i esaki ta pone ku e no ta desaroyá un imáhen normal i kontinuo di e mundu rondó di dje. Autismo ta manifestá hopi biaha durante e promé 3 añanan di bida di un persona. Te ainda nos no sa kon autismo ta originá. Autismo ta un desabilidat i no un enfermedat.
Autismo ta aparesé serka tur klase di hende den tur komunidat. Kada pèrsona ku autismo ta otro.
Bo ta haña hende ku autismo ku diferente nivel di inteligensia pero gran parti ta intelektualmente desabilitá. Mas o ménos 50 % di pèrsonanan ku autismo no ta papia. Tin pèrsona ku karakterístikanan ménos severo. Nos ta papia e ora ei di un trastorno di kontakto ligá ku autismo. Mas tantu hende ku bo ta pensa tin autismo òf tin trastornonan di kontakto ligá ku autismo.
4 pa 5 di kada 10.000 hende tin autismo i si nos konta esnan ku tin trastornonan liga ku autismo aserka nos ta papia di 23 pa 30 di kada 10.000 hende. Autismo ta aparesé mas tantu seka mucha hòmber kompará ku mucha muhé.
E karakterístikanan ku ta sigui por ta presente seka personanan ku autismo. E pèrsona ku autismo por tin un kombinashon di diferente karakterístika i sierto di nan por ta mas severo ku otro.
e ta evitá di wak hende den kara.
e no gusta pa karisi’é.
e no ta reakshoná riba stèm pero si riba zonido di papel.
e ta fasiná pa ophetonan ku ta drai rònt
e tin interes eksagerá i detayá pa sierto tópiko p.e. avion, bestia, boto
e ta protesta fuerte kontra kambio di rutina inesperá.
e ta pega su mes di un manera eksagerá na un opheto.
e ta keda hunga e mesun wega òf hasi e mes un moveshon den e wega pa basta ratu.
e ta ripití palabra òf frase ku un hende papia kuné.
e tin difikultat ku atendé ku otro hende/mucha.
e no tin masha noshon di peliger.
e no ta papia.
e ta preferá hunga su so.
Si bo nota ku desaroyo di bo yu ta diferente for di un mucha di su edat i e ta kuadra ku diferente di e karakterístikanan menshoná ta bon pa bo konsulta ku su dòkter.
Ainda no tin sufisiente informashon tokante autismo na Kòrsou , p’esei a lanta un asosashon di mayor ku yunan ku autismo.
Sigun sifranan mester tin mas 0 ménos 500 hende ku tin autismo òf ta kai den e spektro di autismo na Kòrsou. Mayoria di nan no ta diagnostiká ofishalmente ainda.
